首页
吳君如近日被指遭內地女星介入同陳可辛之間嘅感情。
【灣仔】王菲同李亞鵬離婚，娛樂圈小三傳聞浪接浪。劉嘉玲同吳君如嘅另一半，即梁朝偉同導演陳可辛，都分別出現疑似小三同閨蜜，當然兩位女當事人都表現得若無其事。但前日君如同嘉玲呢對同是天涯人嘅好友，不約而同現身趙薇嘅飯局時，都顯得心事重重。
盛妝到場嘅嘉玲落車時顯得心事重重。
趙薇同老公黃有龍做東招呼一班圈中人晚飯。
■食完飯之後嘉玲同君如打過招呼之後就匆匆離開。
趙薇偕夫請客
前日下晝6點左右，喺中環發現趙薇同一位女性友人去咗名店行街，之後佢哋去到灣仔，幫襯由「富豪飯堂」福臨門位七哥徐維均，另起爐灶所開嘅家傳七福菜館，據聞趙薇都有份投資㖭。大概7點半鐘，劉嘉玲坐住部中港車牌嘅七人車嚟到，仲喺雙黃線落車。雖然盛妝打扮，但係嘉玲都好似冇乜心機，唔知係咪擔心老公偉仔，被傳介入謝霆鋒同周迅嘅戀情有關。相隔唔夠一分鐘，同樣因為被指有小三閨蜜介入感情嘅吳君如現身，同樣頭耷耷冇乜心機上咗樓。兩位舊時好姊妹今次飯局聚頭唔知會唔會互吐苦水呢？隨後趙薇老公黃有龍同黃百鳴、幾名內地生意人亦到場。餐飯食到大概10點鐘，一班人陸續落樓，而準備接老細嘅司機紛紛將車泊咗喺雙黃線等候。君如落到樓打咗個招呼就行返上自己部七人車，而嘉玲亦都冇乜表情上返車離開，反而趙薇同黃百鳴喺條街同人傾咗5分鐘先上車走人。
採訪、攝影：張俊銘、羅德光
http://hk.apple.nextmedia.com/entertainment/art/20130918/18427547
